ਗੁਰਦੀਪ ਸਿਂਘ ਭਮਰਾ

ਕੁਝ ਤੇ ਕਰੋ
ਬਾਲ ਕੇ ਦੀਵੇ ਧਰੋ
ਕਿ ਹੁਣ ਹਨੇਰਾ ਵੀ ਹਨੇਰੀ ਵਾਂਗ ਹੁੰਦਾ ਜਾ ਰਿਹਾ ਹੈ
ਜੋ ਝੁਲਦਾ ਹੈ ਤਾਂ ਸੂਰਜ ਨਹੀਂ ਦਿਸਦਾ
ਚਾਨਣ ਦੀ ਸੋਅ ਨਹੀਂ ਰਹਿੰਦੀ
ਦੀਵਿਆਂ ਵਿਚ ਲੋਅ ਨਹੀਂ ਰਹਿੰਦੀ
ਚੜੇ ਦਿਨ ਤੇ ਢਲੀ ਰਾਤ ਦਾ ਫਰਕ ਨਹੀਂ ਰਹਿੰਦਾ
ਕੁਝ ਤੇ ਕਰੋ
ਹਨੇਰੇ ਨਾਲ ਉਲਝਣ ਦੀ ਹਿੰਮਤ ਜੁਟਾਵੇ
ਤੇ ਹਨੇਰੇ ਨੂੰ ਹਨੇਰਾ ਕਹਿਣ ਦੀ ਜੁਰਅਤ ਕਰੋ
ਕੁਝ ਤੇ ਕਰੋ
ਬਾਲ ਕੇ ਦੀਵੇ ਧਰੋ
ਰਾਮ ਆਵੇ ਜਾਂ ਨਾ ਆਵੇ
ਪੀੜ ਵਿੱਚ ਤੇ ਭੀੜ ਵਿੱਚ ਜੇ ਰਾਹ ਗਵਾਚੇ
ਤਾਂ ਹਨੇਰਾ ਹੋਰ ਵੀ ਬਲਵਾਨ ਹੋਵੇ
ਤਾਂ ਫਿਰ ਚਾਹੇ ਹਨੂਮਾਨ ਹੋਵੇ ਜਾਂ ਕ੍ਰਿਸ਼ਨ
ਲੜਾਈ ਬਲ ਦੀ ਹੋਵੇ ਜਾਂ ਅਕਲ ਦੀ
ਸੱਭ ਹਾਰ ਜਾਂਦੇ ਹਨ
ਰਾਹ ਪਛਾਣੋ
ਪੈੜ ਸਮਝੋ
ਤੇ ਖੁਦ ਪੈੜਾਂ ਬਣਾਵੋ
ਰਾਹ ਸਿਰਜੋ
ਯੋਧਿਓ ਦੂਲਿਓ, ਦੁਲਾਰਿਓ
ਹਰ ਯੁੱਧ ਨਾ ਅੰਤ ਹੀਣ ਹੁੰਦਾ ਹੈ ਨਾ ਅੰਤਿਮ।